بيناتنا المسافة

موضوع: بيناتنا المسافة السبت أبريل 07, 2012 6:56 am

المسافة
صلاح حاج سعيد

لسـّة بيناتنا المسافة .. والعيون ..
واللهفة والخوف .. والسكوت
ورنة الحزن البخافا
تعدّى بى الفرحة ... وتفوت
وأمشى بى الحسرة .. وأموت
*********
الأماني الفى سفر
قبل الزمن .. كايسة المواني
يوم تجيبني عليك .. بصدّق
إنو مرة الحظ طراني
واحتواني معاك شجن .. عذبني قبلك
ولسـّة منك .. جايى تانى
تمشى وين الخطوة عنك
ما الزمن بى الحب بلاكا .. وابتلاني
************
لي عيونك يا مداين الفرحة والحب .. والجسارة
عندي ليك مليون بشارة
وألف خير ... والكلمة شارة
وإنتي لمـّا الحب يهـوّم بى عيوني
وفى عيونك يشقى حائر .. بالأمارة
الفرح منك .. واليك
ويعترينى الخوف عليك
خطوة منك .. خطوة ليك
راجي منك بس إشارة
وكلمة تديني البشارة
ولاّ بيناتنا المسافة ؟